Xa timos (dende fai tempo) resultado do concurso pró novo Concello de Lalín. O que algúns consideran como un "castro pop" e un "proxecto cheo de colorido e optimismo" vai se-lo emblema municipal da cidade do Deza próximamente.

Os gañadores do concurso foron os madrileños Luis Moreno Mansilla e Emilio Tuñón, xurdidos dun grupo dos "millores arquitectos" segundo o alcalde lalinés, prá erguer "un consistorio pra 7 xeraciós, que dure 500 anos" tamén segundo verbas do rector municipal...

No tema económico, cun límite inicial de 6 millós de euros no prego de condiciós do concurso a cantidade foise incrementando ata os 11,5 millós de euros que, ó remate, os arquitectos madrileños cun "gran esforzo" rebaixaron ata os 9,8 millós pra un total de 5.900 m² (calculando, calculando, saen uns 1661 €/m² é dicir unhas 276.367 ptas./m²). Con clientes así dende logo da gusto traballar...

No que respecto ó apartado arquitectónico pouco se pode dicir, pois o que trascendeu de xeito público e transfrontereiro é o que podedes observar na seguinte imaxe que ben se pode asimilar máis a un traballo de deseño gráfico que arquitectónico. O programa funcional componse dun aparcadoiro subterráneo, unha zona de atención ó público cunha "xenerosa praza cidadana" a ras da rúa e a dirección e xestión municipais no primeiro andar. Segundo os arquitectos o proxecto, de 3 outuras e baseado nunha agregación celular, ofrece a posibilidade de "realizar variaciós sen modifica-lo concepto inicial" (o que non queda claro é cal é ise 'concepto').

A prensa especializada califícao de "antimonumental e flexible, na liña da Arquitectura dos 60, e vagamente reminiscente dos castros pre-románs, nunha estructura que aspira a ser un esceario de identificación entre concello e habitantes". Está claro que ainda hoxe unha planta circular segue sendo "reminiscencia" dos castros celtas prá maioría.

A proposta, cumplidora pró xurado coa condición de ofrecer "unha postal de Lalín que permita recoñecelo ó instante" entra claramente por elo na liña das arquitecturas de autor, normalmente espectaculares e sen contido que só ofrecen unha vista impactante, algunhas a nivel de proxecto e outras máis completas a nivel de obra executada. Pode non ser o caso, o tempo definirá se sae da norma ou só se converte noutra marca do depauperado panorama arquitectónico da Galiza, moi visual e pouco consistente.

Outros concursantes foron: MVRDV, Cristina Díaz Moreno e Efrén García Grinda, Soriano e Asociados, Gerardo Ayala, Espejel e Fisac, e finalmente Irisarri e Piñera. Lembremos: segundo o alcalde de Lalín os millores arquitectos do panorama actual (categoría: ego-arquitectura).